ພະແນກເຕັກໂນໂລຊີ ແລະ ການສື່ສານແຂວງອັດຕະປື ສະເຫຼີມສະຫຼອງວັນໂທລະຄົມມະນາຄົມສາກົນ ຄົບຮອບ157ປີ

26/05/2022

ພະແນກເຕັກໂນໂລຊີ ແລະ ການສື່ສານແຂວງອັດຕະປື ສະເຫຼີມສະຫຼອງວັນໂທລະຄົມມະນາຄົມສາກົນ ຄົບຮອບ157ປີ

ເມື່ອວັນສຸກ ທີ 20 ພຶດສະພາ 2022 ຜ່ານມານີ້ພະແນກ ເຕັກໂນໂລຊີ ແລະ ການສື່ສານ ແຂວງ ອັດຕະປື ໄດ້ຈັດພິທີປາຖະກາຖາ ແລະ ສ້າງຂະບວນການແຂ່ງຂັນກິລາບານເຕາະມິດຕະພາບ ເພື່ອສະເຫຼີມ ສະຫຼອງວັນໂທລະຄົມມະນາຄົມສາກົນຄົບຮອບ 157 ປີ ແລະ ພ້ອມທັງຊົມເຊີຍຜົນສຳເລັດກອງປະຊຸມໃຫຍ່ ຄັ້ງທີ II ຂອງກະຊວງເຕັກໂນໂລຊີ ແລະ ການສື່ສານ ໂດຍມີທ່ານ ຂັນທອງ ຍີ້ນດາວົງ ຫົວໜ້າພະແນກເຕັກໂນໂລຊີ ແລະ ການສື່ສານແຂວງ, ມີບັນດາທ່ານໃນຄະນະພະແນກ, ບັນດາທ່ານຄະນະອຳນວຍການຈາກບັນດາບໍລິສັດບໍລິການດ້ານໂທລະຄົມສາຂາແຂວງ, ມີຄະນະຂະແໜງການຕະຫຼອດຮອດພະນັກງານວິຊາການຈາກພະແນກ ຕສ ແລະ ບໍລິສັດໂທລະຄົມມະນາຄົມ ສາຂາແຂວງເຂົ້າຮ່ວມຢ່າງພ້ອມພຽງ.

 

ທ່ານ ຂັນທອງ ຍີ້ນດາວົງ ຫົວໜ້າພະແນກ ຕສ ໄດ້ຕາງໜ້າໃຫ້ຄະນະພັກ-ຄະນະນໍາ ເຜີຍແຜ່ບາງເນື້ອໃນສໍາຄັນໂດຍຫຍໍ້ຂອງບົດຄໍາເຫັນຂອງທ່ານ ບັນດິດ ສາດສະດາຈານ ບໍ່ວຽງຄຳ ວົງດາລາ ລັດຖະມົນຕີກະຊວງເຕັກໂນໂລຊີ ແລະ ການສື່ສານ ເນື່ອງໃນວັນໂທລະຄົມມະນາຄົມສາກົນ ຄົບຮອບ 157 ປີ (17/5/1865-17/5/2022) ທີ່ມີເນື້ອໃນລະອຽດດັ່ງນີ້:
ສະຫະພາບໂທລະຄົມສາກົນ ໄດ້ກຳນົດການສະເຫຼີມສະຫຼອງພາຍໃຕ້ຄຳຂວັນ “ເຕັກໂນໂລຊີດິຈິຕ໋ອນ ເພື່ອຜູ້ອາວຸໂສ ແລະ ສຸຂະພາບທີ່ດີ” ອົງການອະນາໄມໂລກຄາດຄະເນວ່າ ຮອດປີ 2050 ຈະມີຜູ້ອາວຸໂສກວ່າ 65 ປີໃນທົ່ວໂລກປະມານ 1,5 ຕື້ຄົນ ເຊິ່ງຈະກາຍເປັນ ສັດຕະວັດທີ່ສຳຄັນແຫ່ງການປ່ຽນແປງຂອງພົນລະເມືອງ. ການທີ່ມີອາຍຸຍືນແມ່ນຜົນສຳເລັດທີ່ໂດດເດັ່ນແຫ່ງການພັດທະນາເຕັກໂນໂລຊີ, ນະວັດຕະກຳ ແລະ ວິທະຍາສາດ ທາງການແພດລະດັບສູງ. ສະນັ້ນຈຶ່ງມີຄວາມຈຳເປັນ ນຳໃຊ້ເຕັກໂນໂລຊີດິຈິຕ໋ອນ ໃນການພັດທະນາເສດຖະກິດ-ສັງຄົມໃນຫຼາຍດ້ານ ເຊັ່ນ: ສ້າງຕົວເມືອງອັດສະລິຍະເພື່ອເບິ່ງແຍງຜູ້ອາວຸໂສ, ສ້າງຄວາມສະດວກໃນທຸລະກຳ ການເງິນ-ການທະນາຄານ ດ້ວຍເຕັກໂນໂລຊີດິຈິຕ໋ອນໃຫ້ແກ່ຜູ້ອາວຸໂສ ແລະ ເປັນເຄື່ອງມືຊ່ວຍການເບິ່ງແຍງ ຜູ້ອາວຸໂສຫຼາຍລ້ານຄົນແທນຄອບຄົວໃນເວລາທີ່ຈຳເປັນ. ນອກນີ້ຍັງໄດ້ຍົກໃຫ້ເຫັນເຖິງໄລຍະຂອງການພັດທະນາ ເຕັກໂນໂລຊີ ໂທລະຄົມມະນາຄົມ ຕະຫຼອດໄລຍະ 157 ປີ ເຊິ່ງໄດ້ມີການຂະຫຍາຍຕົວຢ່າງໄວວາ ແລະ ໄດ້ກາຍ ເປັນປັດໄຈທີ່ຂາດບໍ່ໄດ້ໃນການດຳລົງຊີວິດ ແລະ ໃນອະນາຄົດ ວຽກງານໂທລະຄົມມະນາຄົມ ຍັງຈະສືບຕໍ່ ພັດທະນາຢ່າງເລິກເຊິ່ງ ເພື່ອຕອບສະໜອງຄວາມຮຽກຮ້ອງຕ້ອງການຂອງການດຳລົງຊີວິດ ແລະ ພັດທະນາ ເສດຖະກິດ-ສັງຄົມ. ສະເພາະໃນ ສປປ ລາວ ໃນນາມເປັນສະມາຊິກ
 
ສະຫະພາບໂທລະຄົມມະນາຄົມສາກົນ ໄດ້ຈັດຕັ້ງສະເຫຼີມສະຫຼອງວັນໂທລະຄົມມະນາຄົມສາກົນ ພາຍໃຕ້ວິໄສທັດການພັດທະນາເສດຖະກິດດິຈິຕ໋ອນ ຮອດປີ 2040 ຄື: “ນຳໃຊ້ເຕັກໂນໂລຊີດິຈິຕ໋ອນ ເປັນເຄື່ອງມືສຳຄັນໃນການຂັບເຄື່ອນທຸກຂະແໜງການ ເພື່ອສ້າງ ເສດຖະກິດດິຈິຕ໋ອນ ແນໃສ່ປະກອບສ່ວນເຂົ້າໃນການສ້າງເສດຖະກິດຂອງປະເທດ ໃຫ້ມີການຂະຫຍາຍຕົວ ຢ່າງເຂັ້ມແຂງ, ໝັ້ນທ່ຽງ ແລະ ຍືນຍົງ” ພ້ອມນັ້ນ ສປປ ລາວ ແມ່ນໄດ້ກໍານົດເອົາວັນທີ 13 ມີນາ 1965 ເປັນວັນສ້າງ ຕັ້ງ ໂທລະຄົມມະນາຄົມແຫ່ງຊາດ ຕາມມາດຕາ 53 ຂອງກົດໝາຍວ່າດ້ວຍການໂທລະຄົມມະນາຄົມ. ການສະເຫຼີມສະຫຼອງວັນໂທລະຄົມສາກົນ ແມ່ນການສ້າງຈິດສຳນຶກ ແລະ ຄວາມຮັບຮູ້ໃຫ້ແກ່ທຸກຄົນໃນສັງຄົມ ເປັນຕົ້ນແມ່ນ ຜູ້ສ້າງລະບຽບການ ແລະ ຄຸ້ມຄອງໂທລະຄົມມະນາຄົມ, ຜູ້ປະກອບການ, ຜູ້ຄ້າຂາຍອອນລາຍ ແລະ ຜູ້ຊົມໃຊ້ທັງຫຼາຍ ໃຫ້ເຂົ້າໃຈຢ່າງເລິກເຊິ່ງ ເຖິງບົດບາດ ແລະ ຄວາມສຳຄັນຂອງວຽກງານໂທລະຄົມ ມະນາຄົມ ຕໍ່ການພັດທະນາເສດຖະກິດ-ສັງຄົມ ແລະ ເພື່ອພັດທະນາວຽກງານໂທລະຄົມມະນາຄົມ ໃຫ້ຊຸກຍູ້ສົ່ງເສີມການຄ້າ ແບບອອນລາຍ, ການຜະລິດອຸດສາຫະກຳ ໃນຍຸກດິຈິຕ໋ອນ ແລະ ການຖ່າຍທອດເຕັກໂນໂລຊີດິຈິຕ໋ອນ ທີ່ກ້າວໜ້າ ຂອງໂລກເຂົ້າມາໃນປະເທດ ເພື່ອປະກອບສ່ວນໃນການຈັດຕັ້ງຜັນຂະຫຍາຍແຜນພັດທະນາເສດຖະກິດດິຈິຕ໋ອນ ພາຍໃນປະເທດ.ໂອກາດດຽວກັນນີ້ ຍັງໄດ້ສ້າງຂະບວນການແຂ່ງຂັນກິລາບານເຕາະມິດຕະພາບ ພາຍໃນຂົງເຂດ ເຕັກໂນໂລຊີ ແລະ ການສື່ສານ ເພື່ອສະແດງອອກໃນການສະເຫຼີມສະຫຼອງຜົນສຳເລັດກອງປະຊຸມໃຫ່ຍຄັ້ງທີ II ຂອງອົງຄະນະພັກກະຊວງ ເຕັກໂນໂລຊີ ແລະ ການສື່ສານ ແລະ ວັນໂທລະຄົມມະນາຄົມສາກົນ ຄົບຮອບ 157 ປີ ຢ່າງເປັນຂະບວນການຟົດຟື້ນມ່ວນຊື່ນ ທີ່ໄດ້ທັງເນື້ອໃນ ແລະ ຮູບການຕາມພາບລຸ່ມນີ້:
 

 

ກຽ່ວກັບຂໍ້ກົດໝາຍ
ເນື້ອຫາສື່ສັງຄົມອອນລາຍ
ວາລາສານໄອຊີທີ
ພະແນກເຕັກໂນໂລຊີ ແລະ ການສື່ສານ ແຂວງອັດຕະປື