ຈຸດປະສົງການຈັດຝຶກອົບຮົມໃນຄັ້ງນີ້ກໍ່ແມ່ນເພື່ອໃຫ້ສ້າງຄວາມເຂັ້ມແຂງຄະນະກໍາມະການຄຸ້ມຄອງອິນເຕີເນັດຂັ້ນແຂວງ, 4 ແຂວງພາກໃຕ້ຄື ຈໍາປາສັກ, ສາລະວັນ, ອັດຕາປື ແລະ ເຊກອງ ໃຫ້ມີຄວາມເຂົ້າໃຈຢ່າງເລີກເຊີ່ງ ແລະ ຮອບດ້ານໃນວຽກງານການຄຸ້ມຄອງອິນເຕີເນັດ ໂດຍສະເພາະຫຼາຍທ່ານທີ່ເຂົ້າຮ່ວມ ຈະໄດ້ຮັບຮູ້ວິໄສທັດການພັດທະນາເສດຖະກິດດີຈີຕອນ ແຫ່ງຊາດ ໄລຍະ 20 ປີ (2021-2040), ຍຸດທະສາດການພັດທະນາເສດຖະກິດດີຈີຕອນ ແຫ່ງຊາດ ໄລຍະ 10 ປີ (2021-2030) ແລະ ແຜນພັດທະນາເສດຖະກິດດີຈີຕອນ ແຫ່ງຊາດ ໄລຍະ 5 ປີ (2021-2025), ຍົກສູງພາລະບົດບາດການຄຸ້ມຄອງລັດ ຕໍ່ວຽກງານຄວາມປອດໄພໄຊເບີ, ວິທີເກັບກໍາຂໍ້ມູນ, ການຊີ້ແຈງແກ້ໄຂ ແລະ ການປະສານງານດ້ານຄວາມປອດໄພໄຊເບີ, ການໂຄສະນາເຜີຍແຜ່ການນໍາໃຊ້ສື່ສັງຄົມອອນລາຍໃຫ້ມີຄວາມປອດໄພ ເພື່ອສ້າງເປັນນັກໂຄສະນາເຜີຍແຜ່ຜ່ານຊ່ອງທາງອອນລາຍ.

ທ່ານ ວິໄລ ແກ້ວມີໄລ ກໍາມະການພັກແຂວງ, ຫົວໜ້າພະແນກເຕັກໂນໂລຊີ ແລະ ການສື່ສານ ແຂວງຈໍາປາສັກ ໄດ້ກ່າວມີຄໍາເຫັນລາຍງານກ່ຽວກັບວຽກຄຸ້ມຄອງອີນເຕີເນັດ ພາຍໃນແຂວງຈໍາປາສັກ ເຊິ່ງມີບາງຕອນທ່ານໄດ້ກາວວ່າ ແຂວງຈໍາປາສັກ ພວກເຮົາແມ່ນໄດ້ມີການແຕ່ງຕັ້ງຄະນະກໍາມະການຄຸ້ມຄອງອິນເຕີເນັດຂັ້ນແຂວງ ເຊິ່ງເປັນປະທານໂດຍທ່ານເຈົ້າແຂວງຈໍາປາສັກ ແລະ ຄະນະກໍາມະການກະກຽມການຫັນເປັນທັນສະໄໝແຂວງຈໍາປາສັກ ເຊີ່ງເປັນຫົວໜ້າໂດຍ ຮອງເຈົ້າແຂວງຜູ້ຊີ້ນໍາເສດຖະກິດ ສອງຄະນະກໍາມະການນີ້ມີຄວາມສໍາຄັນ ໃນການເຮັດໜ້າທີ່ຄຸ້ມຄອງຂໍ້ມູນຂ່າວສານຜ່ານອິນເຕີເນັດ ແລະ ການກະກຽມຄວາມພ້ອມໃນການຫັນເປັນດີຈີຕອນຂອງແຂວງຈໍາປາສັກ ໃຫ້ສອດຄ່ອງກັບການຫັນເປັນດີຈີຕອນຂອງລັດຖະບານ.